Ideia, asmo, amets, ur tanta euri jasan, ez zen bertzerik. Ataka berri batean sentitzean etorri zen ikasketa formalak eta bizitza informalak erakutsitakoa batu eta norabide berri baterantz abiatzea.

Mahastia burutik paperera, paperetik ahora, ahotik bertzeren burura. Harreman berriak sortu errealitate berriak gauzatuz.

Abiatua genuen Baztango Xurie egitasmoa. Balantzarik egiten ez duen artzainaren aulkittoa bezala, hiru hankako proiektua da gurea: mahastia, upategia, enoturismoa.

Ezinbertzekoa izan dugu familia, lagun eta hurbilekoen laguntza, lurrak eta bodega alokatu dizkigutenen gure proiektuarekiko konfiantza eta erosleen babesa.

Gure aldetik herrian sustraituz ontzen doan proiektua kalitatezko produktua eskaintzeko, ekologikoan, lurra, ingurua eta pertsonen errespetuan oinarritua. Aitzinekoa eta egungoa bide berean uztartuz hezurmamitzen ari den gure iraupen luzeko martxa.